Iz zbornika Kastavština
Autor: Ivo JARDAS
Antonja
Na 17. antonjskega meseca ale januara je Antonja ale Sveti Anton. Na Antonju ne bi za vas svet nijedan zapregal konja ni vola, aš je sveti Anton čuvar od blaga i
zavin tega se njigov dan mora pripoznat, pak judi drže blagdan. Neki imaju va dvore na zide figuru svetega Antona. Na Antonju prošacuju malo kmeti, kuliko j'još va
skadnje sena i druge krmi. Govore, da mora bit na Antonju polovicu onega, kuliko j' bilo va skadnje o pozime, kad su kravi prestale na pašu hodit, ale kad su jih
počeli va dvore suhun krmun krmit. Zato, ki misli do Jurjevi so blago, ko ima, prekrmit, mora na Antonju imet još polovicu krmi. Ako je nima, moraju prokurat ale
blaga otprodat, ale pak dat ga va Kranjsko na reju. Nekuliko plati od sake glavi, kako se već pogode, pak Kranjac blago zame i redi ga ale hrani do mlada leta,
kako se pogode.
Kranjci su trebeda blago dobro krmili, aš kad je ka krava debela, susedi deju: „Da ju bog očuva i sveti Anton, da njoj roki ne budu, lepa j' i debela, kako da j' z
reji prišla."
Ako j' pak krava mršava, reču: „Mršava je neboga, ko da ni od Antonji niš pojila. "
Na Antonju gospodar reče družine: „Deca, pazite na krmu, aš je dugo do Jurjevi." Kemu ča od blaga oboli, krava, prasac, konj ale vol, zaveća se da će, ako blago ozdraveje, mašu platit na čast svetega Antona. Tako se čuda od njih zaveća, kad je krava breja, da te svetemu Antonu vošćenu sveću dat, ako se krava na dobre oteli.
Deju, da sej' nekemu Napulijonu Globićevemu junica prveskinja teško telila, pak da j' rekal:„Pomozi njoj ¡sveti Antone, pak ako na dobre pasa, kupit ću ti na
Antonju vošćanicu kod stabar veliku i debelu!" Stabar je greda pul jasaI od tla do štuka, a za stabar je krava vezana. Napulijanovemu sinu Tonetu se j' videlo,
da bi to bila prevelika sveća, pak je rekal: „Ćaća, ne tako veliku sveću!" Otac da j' rekal, aš on da j'sakega prevaril, pak daj' i svetega Antona:
„Sinko, muči sada, a kad bog da na dobre tele, kad sveti Anton već pomore, ću se potle s njin prepogodit, pa ću manju sveću kupit."
Pul Bani deju, da j'greh na Antonju kruh mesit. Neka stara da j' rekla: „Ja ću mesit, tr sveti Anton je mići svetac". Kad je kruh ugjedala s pod črepnji, da j'vrag skočil. Stara j'počela vapit: „Pomozi mi, sveti Antone!". Zad ognjen da j'jedan mali koprcal i govoril: ,,AI ja san mići." Deju, da j'to bil sveti Anton.
Halubje
Va oven kraje Kastafćini, ki j'semo, to će reć na sunac zilaz od Grada, deju, da j' nekada bilo čuda ofčarskeh dvorić, kolib (ale halup, kako su neki deli). Juden, ki su po teh dvorićeh z ofcami bivali, da su govorili „Halupjani". Od tega da j' prišlo ime,,Halubjani", a ta kraj je dobil ime Halubje".
Po sen Halubje se pak najde čuda onako s bršjanon zarašćeneh merin od teh nekadašnjeh dvorić keh je vreme razrušilo. Do najzad, još pred jeneh pedesetak let, rabil je za ofce Matetićev dvor v Lužine. Vas on kraj va šume Lužine okol tega dvorića se zove „Pul Matetićeve ga dvora".
Tamo j' va mlade dni jur z ofcami bil Zvane Matetić Ronjgov, ki naše kantuneti po notah zapisuje. Ni mogal ni k dvoriću, aš je dvorić spal pod Taliju.
Neko leto j'otel poć malo pogjedat tu starinu, ale ]' malo falilo da ga nisu Talijani va pržun pejali. Dvorić je Mateta Matetića z Brda.
Zvončari
Najveći pusni blagdan, i kad judi delaju najveći špaši va Kastafćine, je Pusni pundejak. To je dan pred Puston ale Karnevalon ale Mesopuston.
Na Pusni pundejak hode po Kastafšćine zvončari. Zvončari su maškare, ke nose okol pasa veliki zvonci. To su najveć oženjeni judi ale stareji jači mladići. Slab čovek se ne bi ni posukolil poć za zvončara, aš bi mu se rugali. Bi rekli: „Ča j'ova šušjica zvonci obesila. Mor je ovo moglo i doma bit!"
Zvončari su obuveni va opanki, da moru lagje skakat. Va Kastafsćine ni već z davni opanak, ale za Pusni pundejak moraju bit na saki način, pak jih zvončari kadagod i kadagod prokuraju, najveć z Gromišćini. Kalceti su njin do kolena, a navučene su na bele mornarske brageše. Kalceti su od črjene, modre ale zelene vuni ale od bunbaka, a moru bit i bele. Takove kalceti, aš se navuču ale nataknu na brageše, se zovu natikače, a neki deju i kopice. Mornarsku maju nose. Maja je na črne i bele rigi, rukavi nima. Na hrte nosi zvončar ofčju kožu i maškara mu j'od ofčje koži. Maškara je velika kot jena baretina. Do pol lahtaj' visoka, pak kad ju zvončar na glavu stavi, mu sedi onako na rameneh. Nos na maškaru stave od frmentenega šujka. Obuču ga va črjenu krpu. I oče i usta na maškare zarube s črjenun krpicun.
Va staro vreme su nosili zvončari okol pasa pet šest zvonac, onako mićeh, kakoveh na paše nose kravi ale ofce. Pred jeno pedeset let naručili su Marčeji za zvončari z neke fabriki va Jubjane veliki zvonci, ki drže od jene do sedan litar. Takoveh zvonac oprti zvončar tri manji (od jeno dve - tri litri), ale pak dva (od jeno dve litri) i na sredine jenega (od jeno sedan litar).
Zvončar nosi va desnoj ruke, kako deju va Halubje, „bačuku", to j' okole tri nogi duga palica, ka ima na vrhe dreveni bat ale sekiricu ale boću. Neki pak stave glavu od srni, od zeca, od pasa, od morota, ale ča drugo, tuliko da j'bačuka debja gore lego dole, kade ju drži. Bačuka j'zvončaru kako jeno arma. Ale ja ne pametin i nisan nikada čul, da bi bil ki zvončar va Halubje kega udril. Podrajci deju „mačuga", a na Brešceh deju batac. Ako j' spodobna sekirice, deju „balta".
Va levoj ruke nosi saki zvončar va jenoj kalcete popela. Zvončari ne nose popel v nedeje va pusno vreme, lego samo zadnji dan, i to na Pusni pundejak i na Pust do polna, aš na Pust za polnen već ni zvončari. S tun kalcetun zvončar stresa žensken i prijatelen nad glavun, pak po njih trusi popel. Najraji zvončar ženskoj za vrat natrusi popel. Deju stari, da zvončari popele ženske zavin tega, neka se zmisle, da j' ki ta dankorizma, pak da će se morat norije po bande pustit. Zvončar ne popeli ni ženske ni muškega, s ken je va kakovoj svadbe.
Halubajski zvončari se slože pu Marčeji. Najprej jutro jih re desetak do Garić. Ontrat se vrnu, pak kad je trupa spravna, gredu od sela do sela.
Pred zvončari gre župan, ma on ni zvončar, i onako najstrušneji zvončar, ki njin je kapo. Kad gre jeno dvajsetak zvončari po sele, bomića si jih gjedaju z neken šušpeton. Na sred sela se dva po dva onako z bokon rivaju. Po sele na se vije matače i špaši delaju. Kad se dosti nanore, store kokoru. Jedan časič hopcaju, ontrat znamu maškaru, pak se razajdu po kućah. Judi njin nose vino, olita njin peču i užanca je zvončaru jaje dat.
Zvončari se slože pred feštun. Feštari su opravni kod mornari, lego su jako okrunjeni. Nose bele mornarske brageše, belu baretu i kamižu. Kapo od fešti, ki va tance se to šesti i kasu drži ale, kako deju,„tera", to od tancuri soldi tera ale plaću pobira. On nosi klobuk kod admiral. Feštari ne nose na Pusni pundejak maškaru. Oni stave maškaru samo ako redu tancat va ki drugi susedni tanac. Na bragešah, na kamiže i na barete nose feštari jeni mići žuti zvončići, kodabi lešnjaki. Kad feštar hodi, zvončić rošće, aš je va njin kamičić. Zvončić ni videt, lego samo čut.
Na Pusni pundejak imaju zvončari i feštari još „tata", „medveda" (jeno dveh, ki pusta nose i jenega, ki za puston plače). Pust je od slami storen, obučen kod človek,
a zovu ga „Mate Puste". Judi paraju, da Pustu zavin tega deju „Mate", aš okol Pusta, dvajset i četrtega sečnja, to drugega meseca, pride Sveti Matija.
Pul Viški j'crekav svetega Mateja, pak je na Matejnu va Halubje blagdan. Jedanput pametin, da j'Matejna bila na Pusni pundejak, a jedanput na Pust. Judi su sejno
munjesali i norili još jače leg drugi Pust.
„Medved" tanca i huncutarije dela. "Tat" krade po sele. On zame kade va kuće lonac z ognja ale kemu gospodaru klobuk z glavi. Zvončari ga ulove, pak mora nest
nazada tamo, kade j'zel. Gospodarica ale gospodar za plaću, da su njoj vrnuli ukradenu stvar, prnese vina i mesa, pak ponuti zvončaron, a to se zna, i tatu. Tat
neće zet va siromašnoj kuće, a ni klobuk neće zet siromahu, lego onemu za kega zna da će imet ča dat i da ga ne će oškodit.
Zvončari, tat, medved i oni ki pusta nose, na se vije sakomante, munjesaju i nore po seleh, a feštari, fanti i devičini tancaju. To dura va saken sele, dokle ,,jajari" po kućah jaja poberu. Jajari gredu va saku kuću. Velika ofeža bi bila, da minu neku hmetiju. Saka gospodarica njin da jeno ale dve jaja. Ta jaja pobiraju za feštari. Na Pust oštarica nafriga supic, pak feštari supice razdele divojkan, neč va tance, a neč pul večeri.
Na Prvu sredu skuha oštarica feštaron prežganu juhu z jaji i ofriga fritaju. To se zna, da ni pul tulikeh jaj zadnji kraj oštarice. Ki njoj broji. Ima ona svoj parat. Trefilo se j'jur, da su se jajari napili i razbili jaja. Deju, da j'jedanput neki Mihaj pijan bil. Nosil je oprtiše punu košaru jaj i šal je tancat. Jaja su se sa razbila, to da ni bila leh jena fritaja.„ Se mu j'to", del je pokojni Ivinčić, cedilo po hrte i zdolu po rite".
Kad jajari obajdu se kuće, ontrat averte feštari avizaju zvončari, pak sa trupa (sopci, feštari, zvončari, judi, ženske i deca) ganu va drugo selo. Va ono selo sopet priđe druga curma.
Tako j'to na Pusni pundejak. Va saken sele tancaju, munjesaju, špaš i sakakovu kumediju delaju. Ob sunac zahod priđu doma.
Neka nona Benaševa j' stavjala presnac peć na ognjišće. Prišla j'jena curma va kuću. Jušto kad je da će s ćrepnjun presnac pokrit, skočil njoj je na njega neki Čoko Brtunov. Nona da j'ruki stisnula i zavapila: „Ča si mi to storil, galijote nijedan, bol te ne popala!". Čoko j'rekal, (kako j' povedal pokojni Matok): „Tete, a ča se jadite. Pusni pundejak je, pak san špaš storil." Stari Benaš je rekal: Ja, tr je Mare, užanca j' užanca. Stavi lišto jeno olito peć, a ja gren tentoga golicu vina prnest."
Tako to celi dan dura; tancaju, munjesaju i sake sorti špaši delaju. Judi nose se na kabli vino.Trefi se, da se od tulikeh judi neki i preko meri napiju. Ma ni se trefilo, ča judi povedaju, da bi bila barufa. Trefi se, da se posvade i prete jedan drugemu: „Ča paraš, da te iman straha? Udri, ako si ča." „Niman ni ja tebe. Udri ti mane, ako si kapac." Tako prete, a nijedan ne udri; ni ne pride do barufi.
Drugi dan si zvončari kračasto hode. Ki teško hodi, mu se špotaju: „Kračaš kot zvončar za Puston."
