Ćakula z Miloton Frlanon Joškinen
počasnen članon Halubajskeh zvončari
Napisala: Nina Dukić
Izvor: Glasnik Općine Viškovo
Va srce vavek zvončar
"Na saki korak zvonac moraš čut. Zvonac te strese od peti do glavi i moraš duboko ćutit njigov govor. Srce ti jako tuče i nogi te same napred rivaju i vuču, a ti zvoniš, kanpanaš, greš, vavek napred, napred - do drugega sela i do sakega ognjišča pul kega živeju judi ki nose zvončari duboko va srce".
Tako govori Milo Joškin. Poznate ga? A daste, tako ča leh ne! Ja, ja, to van je Milo ča j'kurijeru sa leta vozil va Troleje i čuda vas puti počekal kad ste za njun tekli. To je on Milo ča su imeli čuda let oštariju na Vožišće, va koj je i moja nona delala. Ma Milo van je i on krepki, veseli zvončarina ki je let i let obahajal i z zvonci protresal saki kantunić našega Halubja. Već malo trudan, ma jako zadovojan uživa va penzije - onoj radnoj i onoj zvončarskoj.
Milo, rečite neč od sebe.
A ča ću reć! Tr me si poznaju! Ja san Milovan Frlan i si me zovu Milo Joškin. Iman 59 let i bivan doma, na starine, tuka na Vožišće. Z manun je i moja Jelka ka j' z Rukavca. Kako je zgojena va zvončarskoj kunpanije, onoj rukavačkoj, iskala j'zvončara. I namerila se na me. Tako odvavek gradimo prijateljstvo mej onemi i ovemi zvončari. Imamo dvoju decu s kemi smo jako štimani. Sina Vinkota ki je nastavi! zvončarsku tradiciju i hćer Milvanu ka vavek rada dočeka zvončari.
Kada ste prvi put obul zvončarski postoli?
Imel san 18 let. Brat Hrvoj već je bil zvončar. On je počel nosit 60-teh let. Nagovaral me je da se i ja prikoštan. Bil san jak, velik, kot ča zvončar i mora bit. Tako san ja šal 1966. leta i naša je familija bila jako štimana aš je dva zvončara z kući dala. Onput ni bilo čuda zvončari. Morda 20 - 30. Komać tamo vokol 1975. je broj zvončari počel rast.
Kuliko let su vas špagi žuleli?
Nikada me nisu žuleli, aš san jlh vavek dobro vezal, a i da su me žuleli, bin potrpel, aš san jih z jubavun nosil seh 35 let. Kad je moj sin oprtil zvonac va veleh zvončareh, ja san fermal. Smenu generacij lepo j'doživet. I ja san za vin tega kuntenat. Magari, kad čujen složan glas kjepeta i roga, ćapa me voja da hitin na se monturu i gren š njimi kot i nekad. Al ča ćeš, semu priđe kraj, pak i mojemu zvončarskemu stažu.
Ma niste po sen sega pomolali?
Ma keee! Baš pomolat! Vavek neč rabi pripomoć. Danaska san počasni član Društva. Pomoren vokol tonbuli, neke organizaciji i sega ča rabi. A mane ni teško. Zadovojan san ča treban Društvu, ča me zovu : i vavek ću bit zvončar va duše, a i va tele, dokle god me nogi budu nosile.
Ma ča to zvončara dela zvončaron?
A kako to opisat, al zreć? To ne moreš! Nosiš to guboko vasebe i znaš da je to ono - neč! To teče va tvojoj krve. Kad antonjski rog zatuli, se te navajer zdiže. Gušt je to ki me i danas drži.
Kako j' nekad bilo obahajat halubajska sela?
A drugačije leh danaska. Čuda tega se j' promenilo. Ruta 'j po pravice jenaka, ma se na više mesti fermuje, broj štacij se j' poduplal. Aja, višejejudi, naselji, pak se i na gušće rabi fermevat. Nekad se hodilo od sela do sela. Bilo je čuda šumi, kopanega grunta i pokošeneh ravni med seli. Danaska seli vec ni, leh je se spojeno z velemi kućami va seh koloreh. Hodili smo po batude, beleh puteh z gromačun kunfinaneh, pak se j'za nami dimilo kot si vrazi. Asfaltirano je bilo tamo od današnje semenarni, pak do parka. 1961. leta se je to asfaltiralo. Drugde su bili beli, lepi, domaći puti.
Morete usporedit kako su vas dočekevali nekad i danas?
Vavek, vavek lepo, i z čuda veselja i jubavi. I nekad i danas. Domaći judi posebno. I neki ki su se doselili, magari je i oneh ki nas nisu i nikad neće prihvatit, ma to jih je malo i baš nas briga. Mi smo svoji na svojen.
Je se drugačije jilo i pilo?
Nekad su po seleh ženske najveć parićale konbasice f režnjići frigani. Danaska se moderneje ji, pak tako i zvončari čeka modernejo jilo - salami, siri, pizze. Nekadar se j' od slatkega najveć delalo ulenjaki i presnac, a danaska je sake sorti slašćic. Mane sakakove pijažaju, pak sagdere najden neč sebe po voje. Mi se para da su najtrju užancu održali pul Petre. Tamo je odvavek obed na šterne i kuhano po domaći. Sarma, kapuz, gulaš... Mmm... i sad diši.
Su kada maškare z zvončari hodile?
Su 60-teh let Bila j' neka grupa kauboji (aš su onput oni bili jako popularni), njih desetak. Zmišjan se Tošota, Bogomila, Njivara... Drugeh maškar ni bilo. Za zvončari je hodilo čuda judi od sela do sela i to po celi dan do kuda je ki arival i dok ga ni prezelo.
Zvončari su poznati va svete. Ste i vi po svete povedal o našemu lepemu kraju?
San. Sakudar san hodil. Bil san va Duseldorfe 1995. leta na međunarodnen karnevale, pak va Verone, Nice, Sloveniji, na Olimpijade va Sarajeve, a spamećujen se i prvega gostovanja va Talije 1974. leta. Bil san i po našoj države: 1967. va Zagrebe na smotre folklora, na Vinkovačkeh jesenah i ovo leto va Dubrovnike.
Kade je bilo najlepče?
Sagdere je bilo jako lepo. Sakudar nemotarije i smeh. Kamo god smo prišli lepo su nas dočekali, a mi smo nastali pokazat se na najboji način. No izdvojil bin jedan poseban događaj od 1987. leta, kada su četiri halubajska zvončara - Davorić, Paučina, Dario i ja bili na Sicilije. Tamo j' bil skup zvončari Mediterana. Prišli su z Trenta, Sicilije, Grčke i mi z Hrvatske. To je bilo neč!
Ča znači bit prvi zvončar?
Na početke trebe bit najstareji po leteh i po staže. A i krepak po korake i tele. Štimano j'bit prvi zvončarina. Mene je tokalo bit prvi i bil san štiman. Danaska se drže isteh reguli i to je dobro.
Ste divojki lovil?
Ma baš me to pitaš! A sega je bilo! Zvončari su vavek tekli za divojkami. Danaska već ne daju. I niki se već nijenega ne boji. A mladi su se odvavek zagjedali jeni va drugeh. I danaska je tako. I neka je.
Ča ćete poručit današnjen zvončaron?
Saki današnji i budući zvončar predstavja svoj kraj i to vavek mora imet na pamete. Neka štimaju svoju užancu i vavek na saken korake na najboji način predstave prelepi kraj z kega prihajaju.
