Ćakula s nekoliko mlajeh člani
Napisala: Tatjana Udović Šaftičina
Haiubajski zvončari su se šesni mladići z našega Halubja - naši oci, muži, sini, barbi i zeti; judini štanji, veliki, z velen srcen za naš kraj, puni forci za klatit okole, a uz to i za malićo popit. Oni štimaju saki bokunić naše zemji i sakega čoveka. A ča se zvončari pasuju za Pust i kako se ćute kada po užance oprte zvonci dozivajuć mlado leto i tirajuć zimu, kada va saken sele popiju, pojidu i škerac store, zapitali smo jih, pak zapisali da se ne pozabi.
Zahvaljujemo na ćakule i informacijah mlajen zvončaron:
Vinkotu Frlanu - Vinetu Joškinemu,
Damjanu Dukiću - Ruzine Lukovemu,
Daliboru Zoretiću - Naranče Ferenčićevemu,
Matije Hostu - Matetu Klanjičinemu,
Zoranu Hostu - Stuparu Mlajemu,
Darkotu Marasu - Daretu Maheićevemu,
Mirkotu Mladeniću - Sročićevemu,
Kristijanu Vlahu - Halfu Bačurkinemu,
i Dinotu Štefanu - Matićevemu
Zvončaron su nekada zabranili pokrivat obraz, ma su Halubjani bili trdoglavi i jedini od seh zvončari danas imaju pokrivene glavi.
Zvončaron se j' fanj tega smešnega i interesantnega dogodilo...
Na jedan Pusni pundejak zvončari su od Turak šli Žegoton, pa va Kastav. Bilo j'dažjevno vreme i blatni šumski putina, a jedan zvončar se j' nebog podrsnul i pal va tu zemjinu. Bele brageše su mu prišle kafene! Arivali su do Žegoti, storili kolo, a od tuda su kretali za Kastav kade su ga čekali njegovi. Znal je da ga komać čekaju videt i, normalno, tel je bit lep i čist. Taj put se j' pokazala zvončarska sloga - zvončari su tekli va jenu kuću po gumu i celega su z tun gumun "otuširali", oprali z prahon i škartačun! Va Kastav je prišal malo mokar, ma tanto čist.
Zvončari su jedanput na Korze delali kolo i jedan zvončar je zahvejal vanka. Zvončar, ki je bil za njin, ga je tel povuć va kolo da judi ne vide kako zgubjeno hveja po Korze, pak gaje ćapal za maškaru i - otkinul mu j'metar koži ž nje! Preostali del Korza je pohajal z plastikun na glave, ča bi reć da mu j'maškara bila malo plešiva.
Po užance, nedeju na Korze si skaču va fontanu. I taj put su skočili, a onda je trebalo poč vanka. Jedan je zvončar vas mokar, z bragešami zalepjenemi za nogi, prehićeval nogu preko i odjedanput čul: FRRR! Kad se j'stal, imel je ča i videt - nogavice su mu se po šave popucale! Kako j' storil korak, tako mu j'nogavica kako lancun okol nog klatila. Zajeno je tekal po neki špag pak zavezal dva kraja te nogavice i tako je nastavil daje.
Jenemu zvončaru se j' pak poplat odlepil pak je po Korze hodil z postolon bez poplata. Zaspravje je bil bos, aš je postol imel samo za lepo videt!
Kad su Pavletićon va Kastav hodili, jedan je zvončar malo munjesal, skakal sakuda po prašće. Preko jene gnojnice j'isto tako bilo veje i prašće nahitano i, kako j' skakal, podrsnulo mu se je i drito je va gnojnicu pasal! Va Kastav je prišal vas od gnoja blatan i curnica se j' ž njega cedila.
Za Halubajski karneval sako leto Dondolaši priđu hodeć z Gromišćine pak jih se dočeka pu Lučić. Jedan Halubjan jih je tako šal dočekat i pomoć parićevat za njih jist. Dobil je zaduženje da reže kobasice. Pomalo je rezal i sako toliko bi hitil jenu va usta. Potla je još pomalo jil dok jih je čekal i kad su Dondolaši prišli - ni više bilo kobasic.
Sako leto na Pusni pundejak zvončarska muzika malo zakraja. Jedanput pu Donjeh Turak su sopli pod jednun garažun, dva su se zagrlili, skakali, munjesali i - pasali su četiri metra zdolun va jenu grižinu i zakračali se va graju. Morali su si prit zivučevat jih vanka aš su imeli skupa z instrumenti jeno 250 kil.
Na jednen gostovanje va Zagrebe jedan zvončar ni ni primjetil da mu se j' zvonac odvezal i da ga vuče tri metra za sobun! Tako je hodil se dok mu neki ni rekal da nima zvonac.
Jedanput jedan zvončar ni šal zvonci nosit na Pusni pundejak aš su mu doma nove prošijani prišle pak jih je rabilo postavjat. To j' onda koštalo si isusovi soldi. Zvončari su prišli po rute do njega doma, videli stavne prošijani i onda - se su poznimali i pohitali va komunjsku šernu!
Jedanputa je prišal jedan fotograf z poznatega časopisa da će tri dni z Halubjani okole lumpat i se slikat. Prvi dan nekako ni bil od voji za pit, ma drugi dan je malo popustil i počel va saken sele po malo pit z drugen zvončaron. Toliko se j'napil da su zvončari pobirali i njega i aparat! Treći dan ni prišal aš se ni mogal stat.
Kad su zvončari bili na gostovanje va Zagrebe, su se medved i ovaj ča ga peja, zgubili. Zvončari su jih iskali sakuda po metropole. Morete mislet kako je to zgjedalo kad su med judi oni hodili onako obučeni! Na kraje je jedan od njih zval od ženi kujinu ka biva va Zagrebe da pride po njih i zapeja jih do Jelačića zvončaron.
Jedanputa je pak za vreme gostovanja va Dubrovnike vrag šal z neken čovekon na pijaču va Cavtat. Čovek ga je na kraje pustil i on je moral celu noć onako obučen iskal prevoz do hotela. A ki će ga onakovega zet va auto?! Celu noć je brižan tako pohajal i stopiral. I konačno ga je jutro, kad su se zvončari budili, neki dopejal.
Kada je bilo gostovanje na Vinkovačkeh jesenah, šlo se j'spat po kućah va okolneh seleh. Par zvončari ni zapametilo uru polaska. Sigurni su bili da se kreće na 11. Na 9 su jih si pozivali na mobiteli, judi pu keh su spali su jih budili, a oni su tvrdili da kreću dve ure kašneje. Kad su jih zvončari konačno dobili na mobitel, su njin rekli da pogjedaju kroz poneštru. Imeli su ča i videt - kurijeru od zvončari kako pasuje! Onda su tekli i iskali ki je još kade doma ostal, aš su si šli na feštu va Vinkovci. Na kraje su žensku z vrta, z traktora zivukli da jih peja.
Na jenemu Dečjemu karnevalu na Korze je pak muzika zapejala decu va fontanu. Mići zvončari su zvonili, a zvončarska muzika je skočila va fontanu. Komandant je pokazal prema njin i skoro sa deca su za njimi pasala.
Par let su zaprli vodu va fontane, pak je jeno leto nekuliko njih va latah nosilo vodu z Mrtvega kanala da bude za zvončari, aš je već tradicija da se zvončari na kraje Karnevala hitaju va fontanu.
Onisti keh su još kako decu dali va zvončari, govore da su njin matere i oci povedaii da njin je odvavek srce živelo za Pust - već bi njin na jesen prišal gust, bi se obukli i po kuće zvonili. A na Pusnu nedeju bi hodili z velemi zvončari koliko god bi zdurali (morda dve štacije dok ne bi zaspali).
Srce sakega zvončara je o Puste tako velo da ga ni bol ne ferma da gre zvonci nosit.
Kad je prvo leto jedan zvončar od 11 let trebal poć zvonci nosit, lovila ga j'gripa i doma je ležal. Dva dana je zdural doma, ma je treći dan rekal da gre, makar pal na pol puta. Jur su mat i otac zmerali, jutro je krenul z februn 38°, kampanal je, celi put zdural i doma se najzad vrntil zdrav!
Zvončari su jedanputa prišli Žegoton kade je jedan od njih ležal doma va posteje bolan. Njegov brat ni dal mira, šal je do njega aš je znal da će ovaj žalet ako bar del puta ne pasa kampanajuć. Zivukal ga je z posteje, obukal i ovaj je šal š njimi. Šal je koliko je mogal, ma se j' ipak zbatil.
Kada su zvončari šli va Lovran, jedan je imel febru 40° (aš su se dan prvo na tanceh goli sukli i munjesali). Doma ni dal mira i šal je z zvončari. Njegovi su znali ča će se dogodit, šli su, za sreću, va Lovran gjedat, pak su ga pobrali kad mu je na pol puta prišlo slabo i su ga zabrankanali doma.
Jedan je pak par dan prej Pusta jako grdo pal z motora i nogu rovinal. Ni napuknjena kost ga ni fermala i cel mesopust je šepajuć zvonili Komać kad je Pust pasal, je zaspravje finil va gipse.
Nekada su se stari zvončari, ako nisu imeli stomanju al mornarsku majicu za obuć, sukli goli do pasa, a kožu suz žicun probili i zataknuli rožicu.
Zvončari i ženske
Povedaju da su nekada ženske komać čekale da zvončari priđu po njih za tancat, a danaska ni već ni ženskeh ke čekaju zvončari, a kad zvončar priđe do jene, onamu reče da smrdi po vine, da je potan i da je blatan. Danaska se više zvončari najdu radi kumpanije, a prvo se judi z drugega sela nisu ni videli jako često, pak su ženske komać čekale da vide svoji mladići. Ma sejeno, još je danas oneh mlajeh zvončari ki va saken sele z gušton z ženskami zatancaju, š njimi popiju dec vina, pak tanac nastave i večer na pusneh tanceh va šatore.
Zna se dogodit da, dok pasuju, ki od zvončari zagjeda svoju divojku pak je odnese sobun jeno 200 metar daje. Moramo naglasit da to jedan štanji zvončar ume jako šesno storit - elegantno prehitit divojku preko ramena pak š njun bežat čin daje.
Isto se j' dogodilo da je jedan od zvončari na ramena naprtil voditeljicu Karnevala, prehitil je preko škini i tako š njun potekoval med redi zvončari. Kad su zvončari odzvonili i zapazili nopak obmjenu voditeljicu, nasrnuli su na nju, pohićevali je i prehićevali, si se š njun slikali, prehitili ju preko još nekoliko ramen dok je konačno nisu vrnuli nazada na pozornicu.
Nekad, kad ženske nisu tele zić van z kuće kad su zvončari prišli, aš su jih se bale, zvončari su znali navuć kolci i graju i pul kuće njin kres važgat kako bi jih dim van z kući stiral.
Ono ča rabi staknut
Mlaji zvončari jako poštivaju stareji zvončari i nadaju se da će i oni zdurat tako dugo kako i oni. Zahvaljuju sen juden ki jih priđu videt, ki jin parićuju jist i ki za njimi pohajaju!
Z sen srcen se nadaju da će zavavek bit tako i da se užanca nikada neće zatrt!
Užanca je med zvončari da mlaji, ken su oci zvončari, zafrkavaju oci da će jih nadjačat, da će pred njih prit pak da će njin kabanice i kapoti prnest aš da njin je sigurno zima, ma oni jih vavek staru aš su to štanji judini i veli zvončari - a mlaji se opeta ne daju...
