Kako je nekad bilo bit podmladak
Napisala: Tatjana Udović Šaftičina
Zaluđeni za ten da budu zvončari
Prvo su zvončari bili samo stareji, štanji muški. Sedandeseteh let su nekeh kako decu oci zvončari zimali sobun zvonit, ale to je bilo malo i nakratko. Deca bi morda hodila jeno selo al dva dok su zdurala, pak nazada šla doma. Zvončari su najprvo opće bili protiv tega da mlaji i deca gredu okolo.
1974. j' pak desetak fantini z osnovne školi, puneh forci, odlučilo poć na svoju voju od Mavar kampanat. Neki su bili sini od zvončari, neki nisu. Maškare su storili od škatule od praha za robu prat, na njega su zalepili kožu, zrezali otvori za oče i zalepili trubac od tulca hrmenti. Neki, ken je otac bil zvončar i imel dve maškari doma, su zeli tu drugu, manju maškaru. Nosili su banderu „Mavrovi zvončari" i 1975. su tako prvi put prišli Marčejan. Onputa se j'za to pročulo i pridružilo njin se je još fantini pak jih je na kraje bilo trejsetak i već nisu mogli bit Mavrovi zvončari, nego su storili novu banderu ,,Halubajski podmladak".
Jedno vreme su se na armunike i na komande menjali Kristijan Frlan i Ervin Jardas - Kjuka; jedan je bil komandant dok je bil drugi na armunike, a si su drugi nosili zvonci. Rute su bile kako rute ke zvončari imaju danas, samo malo skraćene. Hodili su sami, na svoju ruku, pak je prišlo i do barufi. Bili su toliko zaluđeni za ten da budu zvončari da jin nijedan ni mogal zabranit da gredu zvonit.
Kada veli zvončari već nisu znali ča će š njimi, ondašnji Odbor (Mladenić, Jurčić, Rubeša, Juretić, Lučić, Srok) jih je pozval na sastanak i odobril jin da gredu zvonit, ali samo nedeju. Prvo leto su tako mladići puni voje šli i otpraskali tu nedeju do kraja, ma su, jur su znali da ne smeju, prišli i pundejak Bačurkinen. Taj pundejak jih je bilo malo pak nisu hodili za zvončari, ma utorak jih je zato prišla cela četa! Opet pod zabranun, bez maškar su do Mavrovičinega pratili zvončari naganjajuć jih da jih puste š njimi ta dan zvonit. Bilo j'tu suz i plača!
Nekada su imeli pet judi ki su bili zaduženi za red va zvončareh, pak se j'zvalo njih, predsjednika i komandanti i tanto je „podmladak" dobil ultimatum: "Ki se ariva obuć dok zvončari arivaju do Vožišća, more poć, ki se ne ariva obuć, ne more poć". Si su tekli doma, neki i do Marinić, ma dok su zvončari do Vožišć arivali, si su jih čekali obučeni! Od tega leta je startal „podmladak" odvojeno, a potla par let su već imeli i mićega vraga, mićega medveda i muziku i šli su si skupa.
Kada jin se j' telo pridružit još dece, urgirali su veli zvončari i zabranili i dotadašnji "podmladak". Leto dan niki od te dece ni šal zvonit leh su si doma plakali. Kada su opeta krenuli, delali su strašno vele rute. Oni bi se jutro našli i dogovorili kamo će poć. Judi nisu ni bili parićani da će oni prit pak jih ni dočekevalo niš za pojist, leh eventualno kakov sok. Pameti se da, kad su zagjedali jednu škatulu napoletani, na nju su nasrnuli ko da va živote keksa nisu videli al pak ko da deset dan nisu niš jili!
Najveća žalost va „podmlatke"
Onda ni bilo ko i danas da se ima slobodno od školi, leh je rabilo bežat i muljat, a kad bi kako zvončari oko škole pasevali, bi se skrivali. Potla par let se j' organizirala po nedeje nekakova dečja reduta va Dvorane mladosti, pak opeta mladići/deca nisu smeli poć z velemni zvončari nego su jih vatrogasci od Saršoni pejali na tu redutu. To j' onda bila najveća žalost va „podmlatke"!
Kad su se jaja pobirala i potla prodala, z dobivenemi soldi su i deca z zvončarskega podmlatka šla na večeru. Kad jih je krdo banulo va oštariju, Zorica j' va čude pitala: „Deca, od kuda soldi?" Kad se j' potla doznalo od kuda su i ča, iduća leta već ni bilo problema.
Ča se maškar tiče, neč kašneje su se počele delat maškari po sisteme oblikovane žici. Rabi reć da j' to bilo fanjski opasno aš se j'znalo dogodit da kemu, od silnega bedačenja, žica lih pred očijami skoči vanka. Potla tega se j'delalo maškari od plastiki ka se j' zlevala. Bila j' skupa pak se j' doma vavek žicalo soldi. Kilo plastiki je bilo kot današnjeh 500 kn, a kilo plastiki je za maškaru lih jedan sledić. Se ča su deca z "podmlatka" bila stareja, uključevala su se va rad Odbora. Danas su to odrasli judi ki vode Društvo. "
Danas je va zvončareh Podmladak od 120.dece, od keh je 80 smiron aktivno. Oni imaju svoji nastupi na dečjeh karnevaleh, a na veleh tradlcionalneh karnevaleh gredu z velemi. 2007. su prvi put Mići zvončari šli van Hrvatske, na karneval va Ljubljanu.
Ondašnji podmladak su činili:
Sanjin Mladenić,
Sanjin Srok,
Sanjin Rubeša,
Arsen Jardas,
Kristijan Frlan,
Aleks Marčelja (Brentarić) i
Dalibor Marčelja
