Ćakula s Žarkoton Lučićen
Napisal: Viktor Jugo - Veli
Izvor: Novi list
Popularni, senarodni i globalni mesopust, pust, karneval, krnjeval, fašnik al ča je već - ki je lud, neka to ne skriva kot kaška nogi, leh neka pokaže sen da je više lud leh normalan i zmešan. To danas delaju si. Pust, maškare, zvončarl - se je to del modernega vremena kad ne znaš kakovu ti glavu nožice broj 45 i više nose. Postalo je moda, ne vuče me za srce više kako onda kad se malo branilo, malo ni. Pa ne trebaš se napit zaradi tega ča su si pod gason i pijani, leh kad te voja. Zato ostajen mrtav mrzal na se to. Ma, ipak priznan da niman niš kontra oneh ki delaju ča njin je gušt. Sloboda je, demokracija i za pemetni i za drugi. A posebe niman niš kontra oneh ki to odvavek i zavavek jako vole.
Sako mićo i veće mesto, pa i grad, ima svojga kapitana i makiništu od pusta. Danas se si karaju ki ima veću tradiciju, minutažu, originalnost, ovo i ono. Saki je munjen na svoj način, ma tamo va Halubje zna se da je jedan Žare, Žarko Lučić. Puno ga je njih volelo, a i puno i kritikalo za ovo i ono. No, Žarko je takov kakov je, drugačeji ne more bit pa da ga ubiješ. Aš ni muha, po ten je on - slon. On se drži one da sako trubilo ne more bit zvonćar (magari to neki danas vole bit), a zvončar ne srne bit trubilo. Žare od Vajan, zvončar od mićeh i veleh nog, univerzalan, ne samo lokalni, leh kontinentalan.
Senjal je ostal
"Kad san imel tri leta, prvi put san videl zvonćari pul Vajan. Bil san prestrašen i fasciniran i to je zavavek pustilo senjal va mane", piše Žarko. "Ni jih bilo puno, pet - šest najveć dvanajst do petnajst. Teh sedandeseteh let ni se smelo nosit zvonci prej 18 let Kada je to prišlo, rabilo je nabavit masku. Ma ja san svoju sam storil, a prvo gostovanje bilo nan je va Opicine va Talije i onda tri najlepši dani obahajanja po Halubje. Kako se je sen pijažala moja maska, počeli su jih naručevat i tako san va svojen veke storil okole stotinjak orginalneh maškar.
Kašneje san dodal od kaširane karti storen trubac od domaćega blaga - kravi i prasca. Pokle desetak let l tega pusnega transa, počel san obahajat i druge zvončarske kumpanije našega kraja od jutra do večeri - Žejanci, Munci, Rukavčani, Brgujci, Zvonečani i Mučići. Kad san njih obašal, šal san va Sloveniju - va Ptuj i okolicu, Kobarid, Kanal ob Soči, Hrušicu, Podgrad, pa va Čakovec, Trilj, Sinj...
Onda san se otputil po Evrope. Boris Sušanj i ja obašli smo Austriju, Mađarsku, Rumunjsku, Bugarsku, Grčku, Taliju, Švicarsku, Poljsku, Slovačku, pa i Makedoniju. Delal san od 1973. i izložbi va Kastve, Izole, Lovrane, Reke, predavanja, ma uredil i puno izlogi va pusno vreme", piše Žarko.
'Planinareć okole i pokle pohoda na vrh Južne Meriki, Aconcagvu, bil san va Buenos Airese i držal predavanje o Halubajskemi zvončari našen iseljenikon, a prošećal san kot Halubajski zvončar po plaže Copocabana, bil na Glave šećera, Corcovade (Kristov kip) i va glavnoj ulice Rio branco. Z Halubja tamo, pa ča onda!"
Zvončari za UNESCO
Kemu krivo, kemu pravo, Žarko ni bil oni ki samo pasuje i odmahne z rukun na problemi i slično. Na vrhe Aconcagvi je pustil maskotu zvončarića kaje još tamo. Počel je delat prvi suveniri Halubajskeh zvončari, a bil je i njih potpredsjednik od 1973. do 1975, a onda i šef do 1977. leta. "Ekipa je bila za pet - Piković, Brane Milić, Frlan, Bogomir Lučić, Dinko Stupar, Širola, Josip Dendić. Pokrenul san i kolendar zvončari, tu su bili Ronjgi, Bela nedeja, a preselili smo se i va Staru školu pul Marčelji. Storili smo i statut Društva, pa i tombulu, film i prospekti. Gostovali smo i va Nice, va poljskeh Zakoparieh, Smotre foklora Zagreb i Vinkovačkeh jesenah (neki su zvončari tu i ženi našli). Imel san dugoletnju suradnju z Odjelon etnologiji! Filozofskega fakulteta va Zagrebe, etnografskemi muzeji Hrvatske, Bugarske, Francuske i Italije. Nišan čekal da nas neki zove. Imel san ideju i za Halubajski karneval va Viškove, pa muzej (sad je va Rukavce, ma ne preveć otprt - opaska VJ). Kot kreator i izrađivač maski šal san na Dani otvorenih muzeji va Zagrebe, pa va Novi Vinodolski, Belu nedeju, Matejnu, va Dražice i Jelenje. Na izložbah va Lovrane i Reke pratla me gđa Lidija Nikočević, ma i više turističkeh zajednic ovega širega kraja, pa i Primorsko-goranska županija. Nažalost, bilo je i oneh ki me nisu voleli ni podržavali moji projekti, ča je, tu je, niki ni sudac va svojoj kuće." Žarko Lučić misli da sadanji vrh Halubajskeh zvončari jako dobro i moderno delà, pa i ni jako čudno ča su se oni našli na liste onega UNESCO-a kako del svetske kulturne bašćini. Nada se Žarko da će i Hrvatska imet svoj prostor va Svjetsken muzeje mask Binche kraj Bruxellesa va Belgije. Gre se daje, magari se tu i tamo nogi zaplele od onega va bukalete!
Sakemu svoje
Kad bi se Žarkota pitalo ki su mu zvončari najdraži na svete i okolice, zna se ča bi rekal. On ni bil samo oni zvončar ki skoči na junačke nogi kad zatuli antonjski rog, ki se maškara, hiti zvonac na rit, mačuku zame va desnu ruku. On je želel više, gjedal šire, hodil daje, va glave vrtel ča bi se moglo promenit na boje. To morda nimaju si. Neki ne žele niš menjat držeć se stareh užanci, neken je lagje da se gre po staren. Zato i misli da ga trebe jače podržat. Ima pravo Žarko, a drugi tu i tamo.
A kad bi se pitalo ka jezvončarska kumpanija najboja, Žarko bi siguro rekal da neka saki zame ča voli. Ne sme se niš zabranit, neka saki dela svoje i voli ča mu je srcu drago.
